Hukumar Ƙididdiga ta Ƙasa, (NBS), ta bayyana cewa, hauhawar farashin kaya (inflation) a Najeriya ya ci gaba da sauka, in da ta kai kashi 15.1% a watan Janairu 2026, daga kashi 15.15% da aka samu a watan Disamba 2025.
Rahoton ya nuna raguwar kashi 0.05% idan aka kwatanta da watan da ya gabata (Janairu), abin da ke nuni da cewa farashin kayayyaki na ci gaba da sassautawa a hankali.
Kwatanta da Shekarar da ta Gabata
Idan aka duba daga shekara zuwa shekara (year-on-year), hauhawar farashin ya ragu sosai idan aka kwatanta da Janairu 2025, lokacin da ya kai kashi 27.61%. Wannan na nuna cewa matsin lambar hauhawar farashi ya lafa idan aka kwatanta da irin halin da ake ciki a bara.
Hukumar ta kuma bayyana cewa, saurin tashin matsakaicin farashin kayayyaki a Janairu ya ragu idan aka kwatanta da Disamba 2025.
Farashin Abinci Ya Fi Sauka
Rahoton ya nuna cewa, hauhawar farashin Abinci a Janairu 2026 ya tsaya a kashi 8.89% idan aka kwatanta da bara. Wannan ya ragu da maki 20.74 idan aka kwatanta da Disamba 2025, wanda ya kai kashi 29.63%.
A ƙididdigar wata-wata (month-on-month), an samu saukar farashin Abinci da kashi -6.02%, alhali a Disamba 2025 ya kasance -0.36%.
Kayayyakin da Farashinsu Ya Sauka
NBS ta danganta wannan sauƙin da raguwar farashin wasu muhimman kayan Abinci kamar:
- Kwai
- Wake
- Masara
- Dawa
- Waken Soya
- Man Gyaɗa
- Man ja
- Naman Sa
- Rogo
- Kabewa (Egusi)
Me Wannan Ke Nufi?
Raguwar hauhawar farashi na nuni da cewa, tattalin arzikin ƙasar na nuna alamun daidaituwa a ɓangaren farashin kayayyaki, musamman na Abinci. Sai dai masana tattalin arziki na ganin cewa, ana buƙatar ɗorewar wannan yanayi domin jama’a su ji sauƙin rayuwa a zahiri.
Rahoton NBS na wannan watan ya kawo ɗan natsuwa da kwanciyar hankali, musamman ga masu saye da Manoma, bayan dogon lokaci na tashin gwauron-zabi a farashin kayayyaki.
