Kotun ƙasar Jamhuriyar Congo ta yanke wa Shugaban Hukumar Ƙwallon Ƙafa ta ƙasar, Jean‑Guy Blaise Mayolas, hukuncin ɗaurin rai da rai a Gidan Yari, bayan an same shi da laifin karkatar da kuɗaɗen tallafin Ƙwallon Ƙafa da suka kai Dala Miliyan 1.3.
Rahotanni sun ce, an yanke hukuncin ne tare da Matarsa da Ɗansa, bayan bincike ya nuna cewa, sun yi amfani da wasu hanyoyi wajen karkatar da kuɗaɗen tallafin da aka bai wa ƙasar domin bunƙasa harkar Ƙwallon Ƙafa.
Kuɗaɗen dai na daga cikin tallafin da Hukumar Ƙwallon Ƙafa ta Duniya (FIFA) ke bai wa ƙasashe mambobinta domin ci gaban wasanni, musamman wajen horar da ƴan wasa da kuma gina kayayyakin more rayuwa na wasanni.
Binciken ya nuna cewa wasu daga cikin kuɗaɗen sun haɗa da:
- Tallafin COVID-19 da aka bai wa ƙungiyoyin ƙwallon ƙafa.
- Kuɗin da aka ware domin gina cibiyar horas da ƴan wasa a wani yanki na ƙasar.
Kotun ta tabbatar da cewa, an yi amfani da kamfanoni na bogi wajen karkatar da kuɗin, abin da ya sa aka same su da laifin almundahanar kuɗin jama’a da damfara.
Baya ga Mayolas da iyalansa, wasu jami’an Hukumar Ƙwallon Ƙafar ƙasar ma an yanke musu hukuncin shekaru biyar a Gidan Yari saboda rawar da suka taka a lamarin.
Wannan hukunci ya jawo muhawara a fagen Ƙwallon Ƙafa a Afirka, musamman dangane da yadda ake sarrafa tallafin da ƙungiyar FIFA ke bayarwa ga ƙasashe domin bunƙasa wasanni.
