Mujallar kasuwanci ta Forbes ta bayyana attajirin nan na Duniya, Elon Musk, a matsayin mutum na farko da ya kai arzikin da ya haura Tiriliyan Ɗaya na Dalar Amurka. Wannan na zuwa ne bayan da kamfanin sararin samaniya na SpaceX ya fara kasuwanci a kasuwar hannayen jari ta Nasdaq.

Rahotanni sun nuna cewa, an fara sayar da hannun jarin SpaceX kan Dala 150 a kowace Haja, lamarin da ya bai wa kamfanin darajar kasuwa da ta kusan kai Tiriliyan biyu na Dalar Amurka. A cewar Forbes, wannan ci gaba ya ƙara wa Musk dukiya sosai, in da aka ƙiyasta yawan arzikinsa ya kai kusan Tiriliyan 1.1 na Dala.

Tun da farko dai, kafin fara cinikin hannun jarin SpaceX, an ƙiyasta cewa dukiyar Musk ta ƙaru da Dala Biliyan 188, in da ta kai kusan Dala Biliyan 982 bayan an sanya farashin hajojin kamfanin kan Dala 135 kowacce.

Ci Gaban Musk Daga Biliyan Zuwa Tiriliya

Elon Musk ya fara bayyana a jerin attajiran Duniya na Forbes a shekarar 2012, in da aka ƙiyasta dukiyarsa ta kai Dala Biliyan biyu kacal. A lokacin, shi ne mutum na 634 mafi arziki a Duniya.

Sai dai cikin shekaru tara kacal, ya zama mutum mafi arziki a Duniya a watan Janairun 2021, bayan da darajar hannayen jarin kamfanin Tesla ta yi tashin gwauron zabo, lamarin da ya sa ya zarce Jeff Bezos a matsayi na farko.

Muhimmancin Wannan Nasara

Mataimakin Editan Sashen Arziki na Forbes, Matt Durot, ya bayyana cewa, kai wa wannan mataki wani abin tarihi ne da a da ake ganin ba zai yiwu ba.

A cewarsa:

“Hawan Elon Musk zuwa arzikin Tiriliyan Ɗaya na Dala wani babban tarihi ne da ke nuna yadda za a iya samar da dukiya cikin sauri a duniyar da fasaha da haɗin kai suka mamaye.”

Ya ƙara da cewa, wannan nasara ta na nuna sabon babi a tarihin kasuwanci da harkokin ƙirƙire-ƙirƙire na Duniya.

Matsayin Forbes a Bibiyar Attajirai

Tsawon fiye da shekaru 40, Forbes na daga cikin manyan cibiyoyin da ke bibiyar arzikin manyan attajiran Duniya. Tun bayan ƙaddamar da jerin attajiran Duniya na farko a shekarar 1987, Mujallar ta tara bayanai masu yawa da bincike kan yadda attajirai ke samar da dukiyoyinsu da yadda arzikinsu ke sauyawa a tsawon lokaci.

Babban Jami’in Kula da Abubuwan Da Mujallar Forbes Ke Wallafawa, Randall Lane, ya bayyana cewa, babu wata kafar yaɗa labarai da ke da irin zurfin bayanai da amincewar da Forbes ta samu wajen bibiyar dukiyar attajiran Duniya.

Hasashen Musk Kan Makomar Fasaha

A wata tattaunawa ta musamman da Forbes ta yi da Elon Musk, ya yi hasashen cewa, Fasahar Ƙirƙirarriyar Basirar (AI) da Mutum-mutumin Robot (Robotic) za su sauya yanayin tattalin arzikin Duniya cikin shekaru kaɗan masu zuwa.

A cewarsa:

“Cikin shekaru biyar masu zuwa, basirar Dijital za ta zarce jimillar basirar dukkan Mutane. Haka kuma, ana iya samun Mutum-mutumin Robot masu kama da ɗan Adam Miliyan 100 ko ma Biliyan ɗaya.”

Musk ya kuma yi hasashen cewa, tattalin arzikin Duniya na iya ninkawa sau biyu cikin shekaru biyar zuwa shida masu zuwa, tare da manyan sauye-sauye da za su shafi rayuwa da kasuwanci a Duniya.

Madogara: Forbes.