Muhimman Bayanai Daga Rahoton

• Kashi 60% na ƴan Najeriya na rayuwa ne da kuɗin shiga ƙasa da ₦100,000.
• Hauhawar farashi (Inflation) ya ci gaba da rage ƙarfin hada-hadar Jama’a.
• Duk da wasu ƙarin albashi, mafi yawan Jama’a ba sa iya biyan buƙatunsu kamar yadda suke yi a baya.

Wani rahoto da Kamfanin Piggyvest ya fitar a shekarar 2025 ya bayyana cewa, kusan kashi 60% na ƴan Najeriya na samun ƙasa da ₦100,000 a wata, yayin da wasu ma ba su da wani tabbataccen samun kuɗin shiga kwata-kwata.

Rahoton ya kuma nuna yadda matsin tattalin arziƙi ke ci gaba da tsananta ga iyalai da al’umma baki ɗaya.

Haka nan, an jaddada cewa, hauhawar farashi na rage ƙarfin saye duk da ƙarin albashi a zahiri, in aka nuna cewa, Mutane na samun Kuɗi amma ba sa iya biyan buƙatunsu kamar da.

Mafi Yawan Kuɗin Shiga na Tafiya ne Wajen:

° Abinci
° Sufuri
° Hayar Gida

• Mutane da dama na ɗaukar nauyi da tallafawa ƴan’uwa da iyalai, abin da ke ƙara nauyi akan kuɗin shigar da ake samu.
• Rabin ƴan Najeriya ba sa iya ajiyar kuɗi kwata-kwata.

Hauhawar Farashi Da Tasirinsa

Rahoton ya danganta matsalar da raguwar darajar Naira da kuma hauhawar farashi mai tsanani da aka gani a shekarar 2024.

Shugabar sashen hada-hadar Kamfanin Piggyvest Odun Eweniyi ta bayyana cewa, hauhawar farashi ya haura kashi 33% a shekarar 2024, abin da ya sa kuɗin shiga ke rasa tasirinsa duk da ƙarin albashi da wasu Ma’aikata suka samu.

Ta ƙara da cewa, “Mutane na samun ƙarin Kuɗin shiga, amma a zahiri ba sa iya rayuwa da shi kamar yadda suka saba.”

Matsalar Ajiya da Tsaron Tattalin Arziƙi

Rahoton ya kuma nuna cewa, rashin tabbas a tattalin arziƙi na sa Jama’a fifita kashe kuɗi kan buƙatun yau da kullum maimakon ajiya ko zuba jari.

An bayyana cewa:

• Yawancin Jama’a na rayuwa ne daga albashi zuwa albashi.
• Matsin rayuwa na hana Mutane yin dogon shiri na tattalin arziƙi.
• Rashin wadataccen kuɗi na ƙara yawan damuwar rayuwa a ƙasar.

                    Matsin Rayuwa

Duk da ƙalubalen tattalin arziƙin, rahoton ya yaba da juriyar ƴan Najeriya, in da ya ce Mutane da dama na:

• Ƙirƙirar ƙarin hanyoyin samun kuɗi
• Yin sana’o’i fiye da ɗaya
• Da kuma ƙoƙarin tsara kashe kuɗi yadda ya kamata

Sai dai rahoton ya yi gargaɗin cewa, idan matsin tattalin arziƙi da hauhawar farashi suka ci gaba haka, matsalar talauci da rashin wadatar kuɗi za su ƙara tsananta a Najeriya.