Michael Dell Mutum ne da ya yi fice a duniyar Fasaha da Kasuwanci, musamman saboda kafa kamfanin Dell Technologies—ɗaya daga cikin manyan kamfanonin Kwamfuta da Fasaha a Duniya. Labarinsa ya zama abin koyi ga Matasa masu sha’awar kasuwanci da Fasaha, domin ya nuna yadda hangen nesa, jajircewa, da ƙwazo za su iya sauya rayuwa.

Haihuwa da Farkon Rayuwa

An haifi Michael Saul Dell a ranar 23 ga Fabrairu, 1965, a birnin Houston, cikin Jihar Texas, a Amurka. Mahaifinsa, Alexander Dell, Likitan Haƙori ne, yayin da mahaifiyarsa Lorraine Charlotte Dell ƴar kasuwa ce mai hulɗa da harkokin Kuɗi.

Tun ya na Yaro, Michael ya nuna sha’awa sosai ga kasuwanci da fasaha. Ana cewa tun ya na ƙarami yakan binciki yadda abubuwa ke aiki, ya na warware su sannan ya sake haɗa su.

Yadda Ya Fara Kasuwanci Tun Yana Matashi

Michael Dell bai jira ya girma ba kafin ya fara kasuwanci. Ya na da shekaru 12 kacal lokacin da ya fara sana’ar sayar da Hatimin wasiƙu da katunan tattara wa. Wannan ya ba shi damar tara kuɗi tun ya na ƙarami.

Daga baya, ya na makarantar Sakandare, ya yi aiki wajen sayar da jaridun Houston Post. Amma maimakon bin hanyar da sauran masu talla ke bi, sai ya yi amfani da bincike domin gano Mutanen da suka fi yiwuwa su saya—sabbin ma’aurata da masu sabon gida.

Wannan dabara ta sa ya tara dubban Daloli kafin ya gama Sakandare.

Shiga Jami’a… Amma Bai Kammala Ba

A shekarar 1983, Michael Dell ya shiga Jami’ar Texas a Austin domin karantar fannin Likitanci, bisa burin iyayensa.

Sai dai zuciyarsa ta fi karkata wajen Kwamfuta.

A ɗakin kwanan dalibai, ya fara siyan kwamfutoci daga kamfanoni irin su IBM, ya na warware su, ya inganta su da sababbin kayan haɗi, sannan ya sake sayar da su a farashi mai rahusa.

A nan ya fahimci wata babbar dama: Me zai hana a sayar wa Mutane Kwamfuta kai-tsaye daga masana’anta ba tare da dillalai ba?

Dalilin Da Ya Bar Karatu

Kasuwancinsa ya fara bunƙasa sosai tun ya na Jami’a. Cikin ɗan lokaci kaɗan, ya na samun Kuɗi fiye da abin da Mutane da dama masu Digiri suke samu.

Saboda haka, a shekarar 1984, ya na da shekaru 19, Michael Dell ya yanke shawarar barin Jami’a domin ya mai da hankali gaba ɗaya kan kasuwancinsa.

Ya fara kamfani mai suna PC’s Limited, da jari kusan Dala 1,000.

Wannan mataki ya kasance mai haɗari, amma ya yi imani da hangen nesansa.

          Samuwar Dell

Kamfanin PC’s Limited daga baya ya koma Dell Technologies.

Babbar dabararsa ita ce:

• Ƙera Kwamfuta bisa buƙatar kwastoma
• Sayarwa kai-tsaye ga masu siya
• Rage farashi ta cire masu shiga tsakani

Wannan ya sa Dell ya zama kamfani mai saurin bunƙasa a shekarun 1990.

Abin da Ya Bambanta Dell

Michael Dell ya fahimci cewa Mutane ba kawai Kwamfuta suke son saya ba—su na son wadda ta dace da buƙatunsu.

Saboda haka ya kafa tsarin:

• Ka faɗi abin da kake so
• Mu ƙirƙira maka shi
• Mu kawo maka kai-tsaye

Wannan ya sauya tsarin kasuwancin Kwamfuta gaba ɗaya.

Komawarsa Don Ceto Kamfani

A 2004, Michael Dell ya sauka daga shugabancin kamfanin. Sai dai bayan kamfanin ya shiga ƙalubale sakamakon canjin kasuwa da bunƙasar wayoyin hannu, sai ya dawo a 2007 a matsayin CEO.

Dawowarsa ta taimaka wajen sauya kamfanin daga mai sayar da PCs kawai zuwa kamfanin da ke aiki a:

• Cloud computing
• Enterprise solutions
• Cybersecurity
• AI infrastructure

          Babban Cinikin Tarihi

A shekarar 2016, Dell Technologies ta sayi EMC Corporation kan kusan Dala Biliyan 67.

Wannan na daga cikin manyan cinikin fasaha da aka taɓa yi a Duniya.

Dell da Ilimi da Sadaka

Abin ban sha’awa shi ne, duk da cewa Michael Dell ya bar karatu, bai raina ilimi ba.

Shi da matarsa, Susan Dell, sun bayar da fiye da Dala Biliyan 1 ga Jami’ar Texas domin bincike, da tallafawa ɗalibai.

Wannan ya nuna cewa:

Barin Makaranta bai zama ƙin ilimi ba; wani lokaci mutum ya na bin wata hanya ce daban domin cimma muradansa.

             Tasirinsa a Duniya

Tasirin Michael Dell ya haɗa da:

1. Sauya Yadda Ake Sayar da Kwamfuta

• Ya kafa tsarin direct-to-consumer.

1. Bunƙasa Fasahar Kasuwanci

• Ya taimaka wajen ci gaban cloud, servers, da AI.

1. Zaburar da Matasa

• Ya zama abin koyi ga masu kasuwanci a Duniya, tare da Mutane irin su:
• Steve Jobs
• Bill Gates
• Mark Zuckerberg

           Darussan da Za a Koya

1. Fara da abin da kake da shi
2. Gano matsala ka warware ta
3. Ka da ka ji tsoron shiga haɗari ko asara
4. Hangen nesa na iya sauya Duniya

                      Kammalawa

Tarihin Michael Dell ba kawai labarin Attajiri ba ne; labari ne na Matashi da ya ga dama a in da wasu ba su gani ba. Daga ɗan kasuwa a ɗakin kwanan ɗalibai zuwa jagoran ɗaya daga cikin manyan kamfanonin Fasaha a Duniya, ya tabbatar cewa hangen nesa, aiki tuƙuru, da jajircewa na iya rubuta tarihi.